Forma lauak eraikuntza protokoloen bidez eraiki dira, eta horrez gainera, forma geometrikoen sailkapena egiterakoan, triangeluen arteko erlazio kualitatiboak eta laukien arteko erlazio kualitatiboak landu dira. Behin sailkapen horiek eginda, forma horien aritmetikaren eta aljebraren ikuspuntutik azter daitezke.[br]Eraikuntza protokolo honi jarraituz, egin itzazu ondoko hurratsak:[br](1) Eraiki ezazu karratu bat.[br](2) Irudika ezazu haren diagonal bat.[br](3) Neurtu itzazu aldearen eta diagonalaren luzerak.

Egiazta itzazu aurreko eraikuntza horretan agertzen diren balioak, paperean, Pitagorasen Teorema eta kalkulagailua baliatuz.

Pitagorasen Teoremak erakusten du badagoela harreman bat karratuaren aldearen eta diagonalaren artean. Erlazio hori kuantifikatzen saiatuko gara. Horretarako, bikotetan egingo da lan:[br](1) A ikasleak puntu laranja mugituko du.[br](2) B ikasleak koadernoan idatziko ditu aldearen luzera eta diagonalaren luzera.[br](3) Bi ikasleen artean, saiatuko dira aurkitzen zein erlazio dagoen bi balio horien artean, eragiketa sinple bakarra erabiliz.[br](4) Saiakeren kopuruak gora egin ahala, kalkulu-orria erabiltzea gomendagarri izan daiteke.

Karratuaren aldearen luzeraren eta diagonalaren luzeraren artean proportzionaltasun konstante bat dagoela aurkitu da. Idazkera hamartarrean, eta hiru hamartarreko zehaztasunez, balio hori 1,414ren inguruan ibiliko da. Horrek aukera emango dio irakasleari zenbaki errealen inguruan hitz egiteko. Hain zuzen ere, unitate bateko karratuaren diagonalaren balioa, [math]\sqrt{2}[/math] da, Pitagorasen Teoremaren bidez ederki egiazta daitekeen modura.[br]Amaitzeko, funtzio lineal baten bidez modelizatu daiteke aurkikuntza, [math]\sqrt{2}[/math] delako bi aldagai horien arteko proportzionaltasun konstantea, edota bestela esanda, zuzenaren malda. Proportzionaltasuna curriculuma egituratzen duen funtsezko edukietako bat da, eta ez litzateke inoiz alferrik galdu behar hura azaleratzeko aukerarik.